ألعاب أخرىرياضة

نهى كامل تروي لـ«حصري 24» كواليس بدايتها في التحكيم النسائي «حوار»

كتب - أحمد حنورة

ظهر مؤخرا نجاحات كبيرة علي مستوي التحكيم في مجال كرة السلة سيدات، إذ ظهرت حكمة جديدة على طراز فريد من نوعها تخطت مراحل عمرها، أنها نهى كامل، بنت الأقاليم، وإليكم نص الحوار..

نهى كامل تروي لـ«حصري 24» كواليس بدايتها في التحكيم النسائي

من هي نهي كامل؟

أنها نهى أحمد كامل، الشهيرة بـ نهى كامل، لاعبة كرة سلة كنت من ناشئين استاد المنصوره وبعدها انتقلت لنادي جزيرة الورد ثم نادي الحوار ، وعندي ١٩ سنه ، من المنصوره في كلية الاداب قسم الاجتماع، قبل أن تقرر خوض غمار المجال التحكيمي.

كيف كانت بدايتك في مجال التحكيم؟

بدأت بالميني باسكت من وانا عندي تقريباً ١٦ سنه في منطقتي بالدقهليه وبعدها دخلت ترقيه للدرجه الثالثه والحمدلله نجحت وبعدها تم إختياري من ضمن مجموعه كبيره جداً للسفر في مهرجان ميني باسكت في بورسعيد والحمدلله أثبتت نفسي فيه فأختارني الكابتن وائل إبراهيم رئيس لجنه الميني باسكت بمنطقة القاهره عشان أروح أحكم في دوري الميني باسكت في المنطقه عندهم وربنا كرمني بكذا ماتش حلو جداً فبدأت الناس تعرفني ومستوايا بدأ يتحدد ويتنمى بالماتشات لحد ما أخدت احسن حكم ميني باسكيت في منطقه القاهرة.

من هم الداعم الحقيقي لكي؟

أكدت نهى كامل على أن الداعم الحقيقي لي هم أهلي وعلى رأسهم والدي لانه حكم درجه أولى وهو سبب في دخولي مجال التحكيم لاني دايماً كنت بروح معاه ماتشات من صغري وبحب الأجواء اللي حواليه ونفسي اكون زيه وأخليه يفتخر بيا في الحاجه اللي هو كمان بيحبها فكل هذا من وأنا صغيره حلمي أكون حكم دولي.

من الأشخاص الذين ساعدوكي في مجال التحكيم؟

ذكرت نهى كامل، أن كابتن محمد جلال سكرتير اللجنه الرئيسيه للحكام في مصر ساعدني كتير في تفكيري وترتيب أولويات كتير في حياتي ، لانه حقيقي نعم الأب والأخ والصديق من يوم ما قولت يا تحكيم وهو بيدعمني جداً وبيساعدني ومستحمل كل أسئلتي وزني بالاضافه لكابتن وائل إبراهيم رئيس لجنة الميني باسكت بمنطقة القاهره لانه هو اللي حطني على أول الطريق ورشحني لكل حاجه أنا فيها دلوقتي.

ما هي المشاكل التي واجهتك.. وكيف تغلبتي عليها؟

أنا في أول مبدأت عشان أنا من المنصوره وتعتبر بلد إقليميه فكانو بيضحكو عليا ويقولولي نهى أقاليم وكده وفي كذا حد كان بيقعد يقولي البنات بتوع الاقاليم ملهمش مستقبل لأن شخصيتهم ضعيفه وبيخافو وغير كده الست ملهاش غير بيتها وجوزها والكلام ده وحقيقي أنا من اليوم ده وأنا حطه الكلام ده قدامي كدافع عشان أكمل وأوصل لحلمي وبدأت الحمدلله أشيل فكرة الأقاليم دي من دماغ ناس كتير لما نزلت ملعب ف القاهره وكنت قد الماتشات اللي أخدتها سواء على مستوى قوة الشخصيه والإداره أو المستوى الفني ولما دخلت منطقة القاهره محستش أبداً اني من بره او من أقاليم والكلام ده بالعكس أنا طلعت من هناك كسبانه صحاب وإخوات حقيقي من أقرب الناس ليا دلوقتي وأكبر داعمين ليا في حياتي رغم إننا المفروض نتنافس عشان ف نفس المجال لكن في بينا فعلاً حب الخير والتشجيع أكتر من أي حد تاني وطلعت كمان بعلاقات كتير مع مدربين محترمين لأكتر من نادي ولاعبين وأولياء أمور ودي حاجه فرحتني جداً .

ما هي أول مباراة رسمية لـ نهى كامل في التحكيم؟

– أول ماتش ميني باسكت كان في بورسعيد، هيئة القناة x النصر تحت ١٢ سنه بنين.
– أول ماتش في المنطقه، جزيرة الورد x بلقاس تحت ١٤ سنه بنين.
– أول ماتش، اتحاد سبورتنج x سيجر تحت ١٦ سنه بنات.

هل واجهتي مشاكل بسبب أن والدك حكم دولي وسوف يتم مجاملتك علي حساب الآخرين؟

اه واجهني مشاكل كتير ، في امتحانات الترقيه مكنتش بقول اسمي بالكامل عشان محدش يقولي داخله عشان والدك والكلام ده وفعلاً ف يوم الإمتحانات كانت اللجنه تاخد الغياب فعرفو اني بنت فلان فطبعاً فضلو يقولو اني داخله عشانه وانه هيتوسطلي عشان أنجح وأحصل علي ماتشات والكلام ده وفي بدايتي بمنطقة القاهره مكنتش بقول اسمي بالكامل لان والدي معروف فكنت بقول نهى وبس عشان أبعد نفسي عن نفس الكلام اللي اتقال ف الإمتحانات لحد ما الحمدلله ربنا كرمني واتعرفت باسمي وشخصيتي ومستوايا فالناس بعدها اتفاجئت بإني بنته بعد ما كنت أثبت نفسي وعرفو مستوايا بعيد عن إنه والدي، ورغم إنه والدي وكل فخر طبعاً إنه والدي ولكن ده مش سبب اني أحصل علي ماتش حلو او وحش هو ممكن يدعمني أنا اه لكن لو خدت مثلاً ماتش تقيل وانا مستوايا مش حلو الواسطه عمرها مهتساعدني بالعكس المستوى والشغل هو اللي بيبين كل شخص.

نهى كامل
نهى كامل

اقرأ أيضًا.. يارا شحاته لاعبة الأهلي لكرة اليد لـ«حصري 24»: الإلتزام وروح المكسب هما سر التتويج «حوار»

ما هي الصعوبات التي تواجه البنات في التحكيم؟

أوضحت نهى كامل، أن أكبر صعوبه بتواجه البنت هيا فكرة الناس إنها بنت واكيد ضعيفه في الشخصيه لأن ده غلط مش معنى إنها بنت تكون ضعيفة او متقدرش تدير ماتش رجال مثلاً او تسافر عشان تحكم ، وعندنا أكبر دليل الحكمتين الدوليتين كابتن ساره جمال وكابتن آيه خالد ماشاء الله عليهم بيديرو اكبر مباريات الرجال وأقواهم وبكل ثقه وإتقان سواء فنياً أو في قوة الشخصيه وهما فعلاً أكبر وأحسن مثل أعلى لكل بنت لازم تاخده وأولهم أنا وهما أصدقاء ليا على المستوى الشخصي وأكتر ناس بتنصحني عشان اكمل ودايماً بتكلم معاهم وبسألهم وبيوجهوني.

نهى كامل
نهى كامل

ما هي أهم خططك المستقبلية؟

على مستوى حياتي المهنيه هخلص دراستي وإن شاء الله افتح مركز تخاطب وتنمية قدرات لذوي الإحتياجات الخاصه، وبالنسبه للباسكت فإن شاء الله أكون حكم دولي وأكون من ضمن العناصر النسائيه في مناصب الإتحاد المصري لكرة السله ، وبسافر دائما أي مكان عشان أحضر محاضرات صقل للقانون عشان أقدر أنمي نفسي.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى